Sual kitabçaları bakalavrlara niyə verildi? - EKSKLÜZİV
Fevralın 11-də magistratura pilləsi üzrə I cəhd qəbul imtahanı keçirilib. Bu il ilk dəfə sual kitabçaları namizədlərə paylanılıb.
Bəs, görəsən, əvvəlki illərdə kitabçaların paylanmamasının səbəbi nə idi? Sual kitabçalarının bakalavrlara təqdim olunması növbəti illərdə oxşar sualların salınmasına təsir edəcəkmi?
Bildirilib ki, əvvəlcədən elan olunduğu kimi, fevralın 11-də keçirilən magistraturaya qəbul imtahanında sual kitabçaları iştirakçılara təqdim olundu.
"Ötən ay keçirilən sınaq imtahanında da bakalavrlara kitabçaları özləri ilə aparamağa icazə verilmişdi. Mərkəz tərəfindən əlavə olaraq tapşırıqların izahı həm sınaq, həm də əsas imtahandan dərhal sonra DİM-in yutub kanalında canlı yayımla ictimaiyyətə təqdim olundu.
Bu gün həmçinin imtahanda istifadə olunmuş bütün tapşırıqların izahı yazılı şəkildə DİM-in saytına yerləşdiriləcək. Bütün bunlar, əlbəttə, şəffaf və obyektiv imtahanın göstəriciləri kimi qiymətləndirilməlidir. Bilirsiniz ki, imtahandan əvvəl qəbul proqramı, eyni zamanda imtahan modeli “Magistr” jurnalının müvafiq buraxılışlarında dərc olunur. İmtahanın məzmunu ilə əlaqədar bütün məlumatları əvvəlcədən təqdim edirik. Kitabçaların verilməsi və tapşırıqların izah edilməsi iştirakçıların öz imtahan nəticələrini təhlil etməsinə və gələcək imtahanlara daha da hazırlıqlı olmalarına şərait yaradır”.
Kitabçaların imtahan iştirakçılarına təqdim olunmasının əsas səbəblərindən biri də DİM-də artıq uzun illərdən bəri zəngin test bankının formalaşmış olmasıdır.
“Bu illər ərzində magistraturaya qəbulla əlaqədar Mərkəzin test bankına kifayət qədər tapşırıq daxil edilib. Həmçinin yoxlama-ölçmə materiallarının hazırlanması, ekspertizası və s. işlərlə məşğul olan mütəxəssislər yetişdirilib. Ona görə də istər imtahan iştirakçıları, istərsə də, ekspert-müəllimlərin maarifləndirilməsi, bu sahəyə verilə biləcək töhfənin artırılması üçün DİM tərəfindən bu ildən etibarən kitabçaların iştirakçılara verilməsi ilə bağlı müvafiq qərar qəbul olunub.
Müəyyən imtahanlardan sonra sual kitabçalarının iştirakçılara verilməməsi məsələsinə gəldikdə isə bunun müxtəlif səbəbləri var. İlk növbədə dünya təcrübəsində də kitabçaların imtahan verənlərə paylanılması nümunəsinə demək olar ki, rast gəlinmir. Həmin materiallar daha çox təşkilatın intellektual mülkiyyəti hesab olunur. Bundan əlavə, test bankının zənginləşdirilməsinə, yəni tapşırıqlarının hazırlanmasına kifayət qədər vəsait və əmək sərf olunur. İmtahanlarda hər bir test tapşırığının biliyin qiymətləndirilməsində oynadığı rol da təhlil edilir və bütün bunlar onun texniki pasportuna yazılır. Tapşırığın etibarlılığı, validliyi, çətinlik göstəriciləri və sairlə bağlı dəqiq məlumatlar formalaşmış olur. Ona görə də kitabçalar verilməyəndə həmin tapşırıqların bəzilərinin uzun müddət keçdikdən sonra müxtəlif imtahanlarda istifadə edilməsi istisna edilmir. Ancaq tapşırıqlar iştirakçılara təqdim edildikən sonra onlar əlbəttə müvafiq bazadan çıxarılır və növbəti qəbul imtahanlarında test blokuna daxil edilmir”.
