100-dən çox uşağın şahmatla məşğul ola biləcəyi şahmat məktəbi istifadəyə verilib - FOTO
“AISTGroup” MMC-nin növbəti uğurlu layihəsi olan “GADIR GUSEINOV Chess School” un rəsmi açılış mərasimi keçirilib.
tehsilmedia.info xəbər verir ki, mərasimdə elm və Təhsil nazirinin müavini İdris İsayev, Azərbaycan Şahmat Federasiyasının prezidenti, FİDE-nin vitse-prezidenti Mahir Məmmədov, Azərbaycan Şahmat Federasiyasının vitse-prezidenti Faiq Həsənov, Qrossmeysterlər, milli komandanın üzvləri - Şəhriyar Məmmədyarov, Nicat Abasov, Ülviyyə Fətəliyeva, Beynəlxalq Ustalar - Fikrət Sideifzadə, Orxan Abdulov və başqaları iştirak ediblər.
“GADIR GUSEINOV Chess School” eyni anda 100-dən çox uşağın şahmatla məşğul ola biləcəyi beynəlxalq standartlara cavab verən, müasir tələblərə uyğun qurulmuş şahmat məktəbidir. Məktəbə Azərbaycanın Milli Şahmat Komandasının kapitanı, beynəlxalq qrossmeyster Qədir Hüseynov rəhbərlik edir. Ondan başqa, beynəlxalq usta Nail Bəşirli, beynəlxalq hakim və ustalığa namizəd Elşad Abdullayev, Respublika çempionları Afaq Xudaverdiyeva, Əzizə Hüseynova və digər professional şahmatçılar bu məktəbdə məçqçi olaraq çalışırlar.
Məktəbin əsas məqsədi zəngin ənənələri olan Azərbaycan şahmatını dünyada daha da tanıtmaq, beynəlxalq miqyasda qəbul olunan yüksək səviyyəli milli şahmatçılar hazırlamaqdır.
