Aprelin 27-də Masallı Tarix-Diyarşünaslıq Muzeyinin, Masallı Dövlət Rəsm Qalereyasının, Bakı şəhər Mədəniyyət Baş idarəsi Xətai rayon Mərkəzləşmiş Kitabxana Sisteminin və Masallı rayon Mərkəzi Kitabxana Sisteminin birgə təşkilatçılığı ilə muzeydə "Heydər Əliyev ili” çərçivəsində "Zəfər tarixini yazanlar” mövzusunda tədbir keçirilib.

tehsil.media xəbər verir ki, təşkilatçı müəssisə əməkdaşlarının, ziyalıların, qazilər və gənclərin iştirak etdiyi tədbirdə əvvəlcə şəhidlərin xatirəsi bir dəqiqəlik sükutla yad olunub.

Muzeyin direktoru Əntiqə Tağıyeva iştirakçıları salamlayaraq  Zəfər tarixi, onun qəhrəmanları ilə əlaqədar keçirilən tədbirin mahiyyətindən danışıb.  

Tədbirdə Prezident təqaüdçüsü, Azərbaycan Yazıçılar Birliyinin üzvü, Peşə Yönümlü Təhsilin İnkişafına Yardım İctimai Birliyinin sədri, Bakı Dövlət Universitetinin müəllimi İradə Əlili, Milli Azərbaycan Tarixi Muzeyinin elmi işçisi, Azərbaycan Dövlət Mədəniyyət və İncəsənət Universitetinin Muzeyşünaslıq kafedrasının müəllimi Sahibə Ələkbərova, Xətai rayon Mərkəzləşmiş Kitabxana Sisteminin baş kitabxanaçısı Ağgül Mərdanova, Masallı rayon Müharibə, Əmək və Silahlı Qüvvələri Veteranları şurasının sədri Məmmədağa Şiriyev, Qarabağ Müharibəsi Əlilləri, Veteranları və Şəhid Ailələri İctimai Birliyinin Masallı rayon filialının sədri Nahid Rəhimov, Masallı Rayon İcra Hakimiyyətinin əməkdaşı Nurlan Muradov mövzu ilə bağlı çıxış edərək, Qarabağı görməyən lakın Qarabağ sevgisilə böyüyərək bizlərə Qələbə sevincini yaşadan, otuz illik kədərimizə, həsrətimizə son qoyan igidlərə təşəkkür ediblər.

Sonra Vətən Müharibəsi iştirakçıları  Azər və Ruslan İsmayılovların atası Əziz İşmayılov vətənin azadlığı uğrunda mərdi mərdanə döyüşən oğullarla qürur duyduğunu ifadə edib. Qazilərdən Cavid Nuri, Qüdrət Əzizov, Talıb Qəzənfərli həmin günlərin xatirələrini tədbir iştirakçıları ilə bölüşərək, qazi və şəhid ailələrinə göstərilən diqqət və qayğıya görə minnətdarlıqlarını bildiriblər.

Daha sonra təşkilatçılar tərəfindən qazilərə təşəkkürnamələr təqdim olunub.

Yekunda qonaqlar Masallı rayon Mərkəzi Kitabxanasını, Qəhrəmanlar Parkını, eyni zamanda Ağakişibəyli kəndinin şəhidi, Bakı Dövlət Universitetinin tələbəsi olmuş Nurlan Əbilovun məzarını və ailəsini ziyarət ediblər.