2022-2026-cı illər üzrə dövlət proqramı çərçivəsində gənclərin xaricdə təhsil almasına dair Prezident İlham Əliyevin sərəncamına əsasən, martın 30-da başlayan sənəd qəbulu iyulun 14-də yekunlaşacaq. Müraciət olunan ölkələr və ixtisaslar hansılardır?

Kimlər bu imkandan yararlana bilər?

tehsil.media bildirir ki, dövlət proqramı çərçivəsində 15 prioritet ixtisas və dünyanın 19 ölkəsində təhsil üzrə müraciətlər daxildir. Müraciət olunan ölkələr arasında Böyük Britaniya, ABŞ, İtaliya, İspaniya və digər ölkələr üstünlük təşkil edir. İxtisas istiqamətləri üzrə İnformasiya texnologiyaları, maliyyə, dövlət idarəetməsi və digər sahələrə müraciətlər nisbətən çoxluq təşkil edir. Dövlət Proqramı İdarəetmə Qrupunun rəhbəri Turan Topalova bildirib ki, 2022-2026 dövlət proqramı hər il 400 nəfərin yararlanması üçün nəzərdə tutulub. 80 nəfər bakalavriat, 320 nəfər magistratura üzrə olmaqla dünyanın 19 ölkəsində nüfuzlu universitetlərə qəbul həyata keçirilir.
Xaricdə təhsil almaq istəyən tələbələrin müsahibə mərhələsi isə 3 ekspertin iştirakı ilə baş tutur. Müraciət edən namizədlər iki mərhələdən keçməlidir. Müsahibədən uğurla keçən namizədlər haqqında yekun qərar verilir. Proqramın məqsədi gənclərə xarici ali təhsil müəssisələrində təhsil alma imkanları yaratmaqla yanaşı, həm də onların müasir və gələcək əmək bazarının tələblərinə cavab verən rəqabət qabiliyyətli və yüksək ixtisaslı peşəkar kadr kimi hazırlanmasını təmin etməkdir. Artıq müsahibə mərhələsində iştirak edən namizədlər istədikləri ölkəni seçib. Proqrama prioritet ixtisas sahələri ilə yanaşı, universitetlər üzrə top onluqda yer alan istənilən ixtisas sahəsi üzrə bakalavriat və magistratura dərəclərinə qəbul olan tələbələr də təqaüd proqramlarına müraciət edə bilərlər. Dövlət proqramı çərçivəsinə aid olan bütün xərclər Dövlət Neft Fondunun vəsaiti hesabına həyata keçiriləcək. Bura təhsil, təqaüd, viza xərcləri ilə yanaşı nəqliyyat üçün ödənişlər də daxildir. Qeyd edək ki, hazırda dövlət proqramı çərçivəsində 337 tələbə xaricdə təhsil alır.

TƏHSİL MEDİA