"Gənclərin xurafat və radikalizmə meyili vaxtında dini bilginin zəif olmasından yaranır" - AÇIQLAMA

"Məktəblərdə din və mənəviyyatla bağlı ayrıca fənn yaradılmasına böyük maraq olarsa, dövlət standartlarına təklif edilə bilər".

Bunu Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu “Dini düşüncə mədəniyyəti: pedaqoji perspektivlər” mövzusunda keçirilən konfransda çıxışı zamanı bildirib.

İlahiyyatçı Tural İrfan mövzu ilə bağlı Redaktor.az-a açıqlamasında bildirdi ki, o, bu məsələ ilə bağlı illər öncə təklif iləri sürüb:

"Orta məktəblərdə dini-mənəvi yöndə gənclərin maarifləndirilməsinə ehtiyac var. Ölkədə dövlət-din münasibətləri yüksək səviyyədə olmasına baxmayaraq hər halda din dövlətdən ayrıdır və orta məktəblərdə dini fənnin tədris olunması məqbul görülməyə bilər. Lakin müəyyən bir üsulda təhsil sisteminin imkanları daxilində məktəblərdə dini-mənəvi maarifləndirmə təşkil edilə bilər. Bunun üçün sağlam və milli düşüncəli kadrlar olmalıdır. Proqram hazırlanmalı və sistemli şəkildə maarifləndirmə aparılmalıdır. Bunun üçün xüsusi vəsait də ola bilər".O vurğuladı ki, məzhəbçilikdən və radikal təsirlərdən uzaq şəkildə, xurafatdan münəzzəh formada bu məsələ ilə bağlı mühüm işlərin görülməsi vacibdir.

"Gənclərin xarici təsirlərə düşməsi, xurafat və radikalizmə meyil vaxtında dini bilginin zəif olmasından yaranır. Əgər zamanında müvafiq məlumatlandırma olarsa, irəlidə gənclər zərərli yönlərə istiqamət almaz. Tədris ağır və çətin məsələdir. Xüsusən din kimi həssas mövzuda. Kadrlar gərək məzhəbçilik məfkurəsindən uzaq olsunlar ki, sonra məktəblərdə qaş düzəltiyimiz yerdə göz çıxarmış olmayaq. O baxımdan xüsusi fənnin salınması halında bu, əlavə maarifləndirmə kimi nəzərdə tutulmalıdır. Bir sözlə bu məsələ ətrafında ətraflı, obyektiv müzakirələrə ehtiyac var", - deyə Tural İrfan yekunlaşdırdı