Qazi müəllimlər təltif olunub - FOTO
8 Noyabr - Zəfər Günü ilə əlaqədar Vətən müharibəsi iştirakçısı olan müəllimlərlə görüş keçirilib.
Bu barədə "tehsilmedia.info" a Bakı Şəhəri üzrə Təhsil İdarəsindən (BŞTİ) məlumat verilib.
Bildirilib ki, paytaxtdakı 18 nömrəli tam orta məktəbdə təşkil olunan tədbir Dövlət Himninin səsləndirilməsi və Vətən şəhidlərinin əziz xatirəsinin bir dəqiqəlik sükutla yad edilməsi ilə başlanıb.
Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktor müavini, Agentliyin Bakı Şəhəri üzrə Təhsil İdarəsinin (BŞTİ) müdiri vəzifəsini müvəqqəti icra edən Mehriban Vəliyeva Müzəffər Ali Baş Komandan, Prezident İlham Əliyevin Zəfər salnaməsindən, hərbçilərimizin cəsarətindən və qəhrəmanlığından, Zəfər Gününün təntənəli səkildə qeyd edilməsindən söz açıb. O bildirib ki, Zəfər qazandığımız 44 günlük Vətən müharibəsinin və lokal antiterror tədbirlərinin reallıqları, böyük Qələbəmizin əsasında duran xalq-dövlət-ordu birliyi amili, xalqımızın Vətən torpaqlarının azad edilməsi naminə “Dəmir yumruq” kimi birləşdiyi gerçəkliklər gənclərimiz tərəfindən öyrənilməli və gələcək nəsillərə ötürülməlidir.
Mehriban Vəliyeva Vətən müharibəsində müəllimlərin, təhsil işçilərinin Azərbaycanın müasir tarixindəki müstəsna rolundan danışıb. Qeyd edib ki, hər bir Azərbaycan vətəndaşı torpaqlarımızın bütövlüyü, Vətənimizin müdafiəsi uğrunda savaşan qəhrəman müəllimlərimizi tanımalıdır.
BŞTİ-nin müdir müavini Anar Məmmədov Azərbaycan Respublikasının müstəqilliyi və ərazi bütövlüyü uğrunda şəhid olanların xatirəsinin hər birimiz üçün əziz olduğunu və xalqımızın qəhrəman övladları ilə qürur duyduğunu vurğulayıb.
Vətən müharibəsi iştirakçılarından 180 nömrəli tam orta məktəbin müəllimi Əli Abbasov və 221 nömrəli tam orta məktəbin təlim-tərbiyə işləri üzrə direktor müavini Bədəl Hüseynov Qarabağ zəfərini yazanlar sırasında onların da payı olmasından qürur duyduqlarını ifadə ediblər.
Paytaxt məktəblilərindən ibarət xorun ifasında Zəfər Gününə həsr olunmuş “Qələbə” və “Ey vətən oğlu” mahnısı səsləndirilib.
Zəfər Günü ilə əlaqədar qazi müəllimlərə BŞTİ tərəfindən təşəkkürnamələr təqdim olunub.
Görüşdə Azərbaycanın Milli Qəhrəmanı, şəhid general-mayor Polad Həşimovun həyat yoldaşı, BŞTİ-nin əməkdaşı Ofelya Salmanova, şəhid Əlihüseyn Məmmədovun anası, 226 nömrəli tam orta məktəbin direktoru Arzu Məmmədova, 167 nömrəli tam orta məktəbin şəhid məzunu Taleh Yusifovun anası, həmin məktəbin müəllimi Süsən Yusifova, idarənin müvafiq struktur bölmə rəhbərləri, müəllimlər və şagirdlər iştirak ediblər.
Daha sonra tədbir iştirakçıları Heydər Əliyev Sarayında 8 Noyabr-Zəfər Günü münasibətilə təşkil olunmuş “ZəfərFest-3” yaradıcılıq sərgi-festivalında iştirak ediblər.
