ADNSU-da Startup Bootcamp proqramı üzrə Orientasiya tədbiri keçirilib
Aprelin 17-də Azərbaycan Dövlət Neft və Sənaye Universitetində (ADNSU) "Rəqəmsal İnkişaf və İnnovasiyalar Mərkəzi” və "Eazi start” Startap məktəbinin təşkilatçılığı ilə Startup Bootcamp Orientasiya layihələrinin təqdimatı keçirilib.
ADNSU-dan "tehsilmedia.info"a bildirilib ki, ARİİM "Araşdırma və Təhlil” bölməsinin rəhbəri Aysel Sadıqova açılış mərasimində çıxış edərək layihənin məqsədi, təlimlərin mövzusu və startaplardan danışıb. Layihənin məqsədinin ölkədə innovasiya fəaliyyətinin davamlılığının təmin edilməsi olduğunu deyən A.Sadıqova innovativ ideyaların inkişaf etdirilməsi üçün tələbələrin innovasiya və startup üzrə biliklərinin inkişaf etdirilməsinin əhəmiyyətini qeyd edib.
ADNSU-nun Rəqəmsal İnkişaf və İnnovasiyalar Mərkəzinin direktoru Rasim Abdullayev Bootcamp-ın məqsədi, hədəfləri, tələbələrin startap ideyalarına dəstək verilməsi, komandaların formalaşdırılması və bazar imkanlarının araşdırılması haqqında tələbələrə ətraflı məlumat verib. Startapların inkişafını təmin edəcək ekosistemin formalaşmasını dəstəkləyən bu cür layihələrin əhəmiyyətindən danışan R.Abdullayev ADNSU-da əlverişli startap mühitinin olduğunu və startap ideyalarına, həmçinin bu ideyaların regional potensialının inkişafına dəstək verən hər cür şəraitin olduğunu deyib.
Gənclərin startap layihələrindən danışan "Eazi start” Startap məktəbinin koordinatoru, dosent Elviz İsmayılov Bootcamp-ın tələbələrin startap ideyalarının yaradılması və mövcud startapların təkmilləşdirilməsi baxımından xüsusi maraq kəsb etdiyini qeyd edib.
Sonda tələbələri maraqlandıran suallar cavablandırılıb.
Qeyd edək ki, 1 ay davam edəcək bootcampda tələbələrdə startapçı və sahibkar düşüncənin formalaşması, düşüncə tərzi, marketinq: bazar təhlili və araşdırması, komandanın qurulması və inkişafı, biznes plan və maliyyə planı, layihələrin idarə edilməsi, dizayn və prototipləşdirmə, emosional zəka mövzularında və s. təlimlər təşkil olunacaq.
Proqram 4 həftə ərzində 8 təlim mövzusu ilə həftənin III gün 11:30-13:00 və 13:30-15:00 V gün 11:30-13:00 və 13:30-15:00 saatlarında peşəkar mentorların iştirakı ilə keçiriləcəkdir.
